• 【當年破格小生全裸上陣】60歲吳岱融高山低谷:我今日係由人氣最低處爬番上嚟
  • 2019-10-23    

 

「或者呢行嘅人覺得吳岱融係一個人氣跌得好犀利嘅人,但我由人氣跌到好犀利慢慢上升,喺呢個過程裡面,我真係睇到好多嘢。」

60歲,吳岱融無諗過走到呢個年紀,仲有機會重登男一之位。

80年代,佢係大台當家小生,同梁朝偉平起平坐,當年代表作有《絕代雙驕》嘅「花無缺」、《邊城浪子》及《原振俠》等。

退一步想,覺得當年同TVB鬧翻,只怪年輕時嘅自我,令事情處理不完善,惹人誤會所致。
當年同TVB鬧翻離開,退居幕後。同TVB一別22年,15年回巢面對另一番景象,佢唔介意自己由小生變二線,但憑著佢對任何角色嘅尊重演出,今日60歲重登男一位。

同大台鬧翻另有內情

但93年,因為同TVB鬧翻解約,不歡而散,亦開始進入佢嘅低潮期。當時傳出鬧翻嘅版本,係吳岱融私自去亞視宣傳佢嘅處男唱片,然而當事人透露,反面是另有內情,只怪自己當年處理不善。

「其實同唱片無關。本身唔想講,不過都可以略略提一下。其實成件事,係我接咗一個job,點都好,我唔想攻擊任何人,不過當中一定有一兩個人被誤解。當時拍完《原振俠》無耐,我喺外邊接咗三套電影,點知公司話要開一套劇,我唔開名喇,總之係一套講述醫療嘅時裝劇,我擔演男主角,我本身幾鍾意,都希望接拍,於是我推咗嗰三套電影,連訂金都退番俾人。點知轉個頭電視台突然通知我,唔知咩原因套劇唔拍喇,呢個就係導火線。」吳岱融。

最後佢接拍番三套電影,但喺呢個時候,無綫另一個監製向佢招手,佢一口拒絕,成為禍根。

吳岱融續說:「問題之處就係因為有人會覺得,A監製搵我就拍,我(B監製)嘅戲你就唔拍,我就係咁樣出咗事。早期嘅我有時候唔會妥協,因為太自我。」
60歲,型佬味對佢事業更有幫助。
80年代吳岱融係當紅小生,同梁朝偉雙男主角拍《絕代雙驕》,佢飾演「花無缺」。

吳:當年佢哋都想趕我走

「當然依然睇番,只要當時我補番一個電話,就可能繼續留喺公司拍落去。不過人生好難解釋,每個階段都係隨心,今時今日嘅我當然識得咁樣做。故事就係咁樣,之後就有好多其他理由,一來我想走之餘,佢哋亦都趕我走。整定嘅,好多嘢都無得解釋,我亦覺得走係遲早問題,因為關乎當時嘅心態,就算呢套戲無發生,可能下一套戲都會發生。不過對我嚟講亦都係好處,唔好一面倒永遠都係男一,否則睇嘅嘢都會唔同,但當然外闖過程係艱苦。」

拍三級片非為錢而去盡

同大台脫鈎,同年佢把心一橫,拍咗套三級片《滅門慘案之孽殺》,一係唔拍,一係就去盡全裸露下體,而對手正是女友鍾淑慧,即現任太太。

當時外界對佢拍三級片,標籤為:「求出路,為搵錢」,甚至行內人認為,佢將自己推向死角。感到被誤解了廿六年的吳岱融,終於為自己平反。

「到今時今日,好多人仍然忽視咗我嘅態度,甚至有人話我梗係收咗好多錢,我可以話俾你聽係無嘅!而且某啲演出方案係我提出,例如正面全裸係我提出。我睇過一啲好生活化嘅日本或者外國電影,兩公婆嗌交,佢真係無著褲吹緊風筒,你就可以睇到生活化嘛,而唔係你哋睇嘅嘢,嗰個年代我已經有呢個想法,現實的確會發生呢種情況,當時(小生全裸拍戲)我都差唔多算係第一個人咁做。」
當拍全裸露下體於銀幕的三級片,對手正是現在的妻子鍾淑慧。

演隻狗就要似隻狗

「我覺得演一隻狗就要似一隻狗,雖然嗰套係三級片,但我眼中唔係三級嘛,其他製作人或投資者將呢件事放喺另一個角度,呈現俾觀眾係佢哋嘅事,我係覺得嗰場戲有需要嘛!

點解到而家六十歲,我演嘅戲仍然有人認同,我唔敢話自己演得好,但至少係做好自己本份,原因我對呢份工作嘅專注同尊重。

套戲對手係我太太,即當時係我女朋友,佢俾劇本我睇,我睇完尊重佢決定,只要佢認為鍾意嘅就即管去做,我會支持。好彩我都係一位演員,否則唔會有男人鍾意自己嘅女朋友咁樣做(拍三級片),當時我真係無諗拍完有咩外界壓力要面對,只覺得嗰場戲應該咁樣就會去做,將場戲演好佢,而唔係諗其他人會點樣睇自己。」

失時反之有得著

三級片後,佢全線退出幕前,轉戰幕後,由小生變導演,經歷過風光不在。別人嘅眼光係最大考驗,喺艱難裡面,佢冇悔當初。

「暫停幕前,人氣係跌咗嘅,一直下跌,但我角度,只係覺得每件事都有得失。我冇諗過人氣跌咗會怎樣?後來人氣慢慢跌,好多人會喺我耳邊問,你而家點樣呀?無論係觀眾、朋友、屋企人,我相信係善意嘅。只係在佢哋眼中,認為我本來埋親位都係主角,前呼後擁嗰啲人喎!

但我會用得失嘅角度去睇,例如好多好紅嘅藝員,佢哋真係要犧牲自己嘅私生活,例如結婚生子,去繼續佢哋嘅事業。我有少少唔同,就係咩都唔理做咗先,我嘅作風喺當時嗰個年代係比較介意,因作為一個男偶像,結婚生仔要低調。

但我就掉番轉,想點做就點做囉,我知道嗰時有朋友覺得我任性,而事實上都係㗎!因為有幾多千人想爭取做男主角都做唔到,而你做到,跟住被人覺得你有少少賴係……,但我真係唔係嗰種賴係……我係隨心啫!

於是一停幕前就結婚,完全脫離幕前事業。當時我可以同兒子、老婆,我家人行吓公園,做好多嘢係當時好多好紅嘅朋友未必做得到嘅,至少我可以同家人好自由咁周圍去。」

低潮時反而聽到真說話

不過人生,無永遠嘅敵人,相隔22年,重返TVB,昔呢位大台小生,唔在乎退落配角。

「好多失蹤熒光幕嘅人後來返嚟,效果都好好嘅,我又冇諗跟住要點嘅,人嘅嘢,最怕你心裡覺得所有嘢係理所當然,如果你覺得理所當然,你咪唔開心囉!成日問點解我唔係男主角呀?或者點解戲份唔重呀?人工點解咁少呀?成日咁諗就一定大鑊。

所以回巢後我冇唔舒服,我個心又唔太介意。我又做過幕後又做過導演,我好明白嗰啲製作人、投資者諗法,你冇人氣佢唔會搵你,呢個係好現實嘅遊戲。」吳岱融說。

演員生涯最低點,係05年復出幕時, 46歲嘅佢由低再爬返起,首先學識放下身段。

演員好被動,冇人搵你嘅話,難道你自己去敲門,冇㗎!我哋冇呢種遊戲,最多咪同個導演打吓交道,但人哋揀唔揀你,就視乎角色啱唔啱你,或你嘅人氣夠唔夠。於是我覺得無論咩人搵我都好,什麼角色都好,一場戲都好,兩場戲都好,錢少到不得了都好,或者安排入住嘅酒店係幾咁不堪都好,我都做,好過坐喺度嘛!可能係我呢種心態,令我可以慢慢滲番入圈子,慢慢開始多人搵番我開工。

或者呢行嘅人覺得岱融係一個人氣跌得好犀利嘅人,但我由人氣跌到好犀利慢慢上升,喺呢個過程裡,我真係睇到好多嘢,睇到好多人哋唔需要喺我面前講好說話嘅嘢,我諗你明我講嘅。如果我一直處於理所當然嘅高位,佢地聽嘅嘢同睇嘅嘢會唔同。

曾幾何時我喺高峰時,算做好紅嘅時候,我喺香港有三、四架車,後來同太太返咗國內住,真心話,國內嘅生活費亦都便宜啲,嗰時我供一層1400呎嘅樓,都係3千元。國內生活初期我冇車,到後來有輛行得吓,但好差嘅車代步,但我已經好開心,人就係咁㗎啦!唔好太理所當然,因為唔一定㗎!」

採訪:S.Lo

攝錄:吳斯金

攝影:葉嘉穎
低潮時,吳岱融認為最大得著是家庭生活。

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z