• 【苦盡甘來愛妻號】51歲黃智賢揸波子車老婆拍拖 最霉時敲監製房攨撈一集即死都做
  • 2019-10-22    

 

日前生日踏入51歲的黃智賢,他的老婆又fit又省鏡,而且出入揸波子,更係醫學美容中心老闆。演藝事業上,更多次被提名最佳男主角,問鼎視帝只是時間問題。加加埋埋,難怪叫人羨慕。不過,大家羨慕佢而家擁有嘅,反而忘記咗,黃智賢只係苦盡甘來!

黃智賢因為《真情》阿海一角成名得快,之但係佢真正嘅考驗係人到中年嘅時候。

黃智賢逐步成為TVB劇集主要演員時,2000年突然離開,4年後又再回歸。當時,佢深深體會到何謂「今時唔同往日」,事關佢成三十幾四十歲人,竟要學啲新人一樣,逐間監製房去敲門,話:「我返咗嚟喇,有無劇啱我做嘅?」

黃智賢嗰時真係咬緊牙關捱過去,無論角色係三集還是一集佢都要做,因為佢自認唔係靠新聞去炒作名氣嘅人,所以「歸根究底都係要演好自己啲戲。無論機會大與小,做好佢,始終相信有人會睇到」。黃智賢唔怕蝕底唔怕賺少啲,一集都拍,例如《紫禁驚雷》第一集就瓜柴,《天與地》又係咁,但已經足夠令觀眾發現佢好好戲!再順勢憑《潛行狙擊》辣薑一角奪得「最佳男配角」,之後年年唔係獲男配就係男一提名。

演藝事業步入收成期,又同陳煒的醫生拖友陳國強合伙開設醫學美容中心做老闆,親力親為。不過,令黃智賢最自豪嘅,始終都係由青春期已經一齊至今逾廿年嘅老婆。鬧交嗌分手點會無,但佢哋清楚自己無小朋友,明白幾好嘅朋友都唔會一直走落去,只有另一半先係相依為命一齊經歷生老病死,所以知道「珍惜」嘅真諦,一得閒唔使拍劇就要化身糖黐豆。

黃智賢同老婆拍拖行商場,拖到實兼雞啄唔斷睇落已經好sweet,未夠!仲要夾糖食,甜到底!作為幕前演員,忍口keep身形是常識吧,但老婆餵到埋口咁甜蜜嘅舉動就唔拒絕得喇。話時話,不得不讚下黃太,睇佢成程路不停將軟糖塞入口明顯係嗜甜嘅人,但身材keep得相當唔錯,著上一條平口低胸吊帶連身短裙,都幾貼身㗎,但身材勻稱,體態年齡停留喺十八廿二,背面睇仲以為妹妹仔添。心態似乎亦年輕,睇中心頭好但店舖已經收咗檔冚咗布,佢就百厭地行埋去挑起啲布𥄫兩吓。至於愛妻嘅黃智賢,由得老婆邊食邊睇,自己就拎晒啲粗重嘢一抽二褦。有個咁好嘅老公,難怪一到電梯,老婆就從後環抱,攬實黃智賢啦。

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情 https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情 https://s.nextmag.hk/e/Tssefy687Z