• 【視點31杜汶澤VS阿叻】黃秋生評:用情緒刺激對手失敗變爛仔交
  • 2019-11-05    

 

港台節目《視點31》請嚟杜汶澤與陳百祥「談局勢論民情」,香港市民相當關注。不過,大家睇完之後或多或少都有啲失望,黃秋生都一樣,佢話:「好悶!無乜睇頭,唔似辯論,無乜精警嘢。」

秋生理解阿叻有自己道理,並非強詞奪理,但基於一個辯論而言就缺少理據:「佢無強詞奪理,佢有佢自己道理及立場,『我就信警察喇』等於我話我信耶穌一樣啫。佢話:『總之我信。』如此推論你就知佢個思維模式係什麼東西。有人係總之我信,總之我肚痛唔睇醫生,我食符!有嘅,但唔等於佢啱。不過,你話我信警察或者我信政府,呢個唔係宗教,係關乎法理,咁就唔可以咁主觀。『我信』,我要講我點解信,要有理據,大家要拎個理據出嚟辯論。」

至於阿澤,秋生直言失望,更指佢用情緒刺激唔到對手,變成爛仔交:「失望囉,我以為阿澤會有啲好機智嘅嘢,因為佢對個情況應該理解多過阿叻,好明顯無做功課,無例證。其實好容易提出例證,即係佢講話咩『你衝擊、你暴徒』,但其實好多畫面,我哋見到好多人企喺度就已經被防暴警員暴力攻擊。甚至有啲人都無講嘢就被攻擊,呢啲例證真係罄竹難書,應該舉證呢啲。阿澤係爛仔交,辯論上面有啲守則,你講完我講咁樣,大家保持冷靜狀態,咁先有得辯論。你就張開喉嚨扯晒青筋,咁樣好難辯論,呢個守則就無遵守到,變咗喺度嗌交咁樣。或者當你用情緒去刺激到對手,係可以嘅,但明顯幾次都刺激唔到佢吖嘛。」

最後,秋生又談到現時警察所謂嘅執法,其實係一種偏見,即「用偏見去犯法卻當成執法,然後對群眾造成滋擾。」又評論浸大學生記者被警員警告會雞姦一事,指呢啲警員其實好小學雞,好無知:「有種扭曲心態佢就好開心,好似鍾意搵煙頭去辣啲貓狗咁囉,有啲人格扭曲。平時呢啲人可能喺工作或家庭入面應唔係咁被人睇得起。」

-----------------------------

【2019 區議會專題】

最齊全區議會入閘名單 互動民調

11.24 用選票重奪區議會

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情地址