• 【神鵰傻姑】為有師奶角色演谷肥自己 58歲陳安瑩:食肥自己先至有戲拍
  • 2019-11-07    

 

現年58歲嘅陳安瑩,最令觀眾有印象嘅一定係83年劇集《射鵰英雄傳之東邪西毒》中嘅儍姑,唔講大家未必知道,佢係黃飛鴻關德興個契女,細細個就做粵劇,同過新馬師曾同台演出過。講起做粵劇童星,陳安瑩話有淵源,「鄧碧雲媽媽,係我媽媽嘅契娘,我叫佢媽媽做婆婆仔,叫鄧碧雲做碧姨媽,所以自小已經有接觸,同埋我相信自己小時候都幾精靈,眼大大,後來因為近視所以對眼只縮細咗,都唔錯㗎,又唔怕醜,同埋又接觸過呢一行。因為有大人帶住,所以都唔錯,大概七歲左右正式上契關德興,當時關德興最後一任太太住喺美國,我係佢哋嘅契女,後期再收咗幾個契女,而家佢已經唔喺度,但以契女嚟講,我輩份最高但年紀都係最細。所以自小已經接觸戲行,有演過大戲。」



演戲無分師奶戲同主角戲

陳安瑩接受蓋世寶訪問時,話本身係諗住讀完中七考女警,但當時因為媽咪一句說話而走咗去考無綫嘅第八期藝員訓練班,同期嘅有艾威、廖啟智等人,佢話:「有一日見到隔籬台訓練班招生,我講咗句「TVB我就會去啫!」。直至有一日落雨,阿媽就同我講,因為考完試無嘢做,佢問我唔係去報名咩?我話落緊大雨唔去喇,佢話有心就無論如何都會去到嘅!最後我就去咗報名。」蓋世寶對住陳安瑩好直言,話無見佢一段時間,覺得佢多咗少少福氣,陳安瑩笑住答:「其實唔係而家,以前喺TVB時要轉型,飾演人妻、媽咪同埋清潔阿嬸、街市婆,或者掃地工人,總之係一啲街坊角色。對我嚟講,一向比較娃娃臉,因為身型唔高,所以唯有食肥自己,有少少福氣,然後身旁至適合有老公同小朋友,咁樣先至有戲拍,否則就好容易under show。雖然時下一般媽咪都好年輕、纖瘦,不過我喺熒幕上俾觀眾嘅感覺唔係咁樣,如果身型纖瘦,唔係會有好多姑姐角色可以飾演。唯一辦法,因為我鍾意演戲,演戲無分師奶戲同主角戲嘛,所以增肥都唔緊要。我覺得最緊要係健康,如果肥得嚟又周身病痛,咁我就唔OK啫。」



鍾意有進步

陳安瑩真係好鍾意演戲,佢唔介意為咗師奶角色而谷肥自己,不過,佢知道師奶角色有限,所以,12年拍完《怒火街頭2》後,就離開無綫,去香港電視,佢話:「我離開TVB前會增肥去飾演師奶角色,喺當時立場嚟講已經算成功,因為真係可以飾演師奶。你諗吓,而家時下戲種,多唔多師奶角色?喺創作劇本嘅時候都唔會寫一個咁嘅角色。我離開之前最後一套劇係《怒火街頭2》,當時我喺TVB已經唔係演有五頁對白嘅戲,一向都會有對白,但唔係講五頁對白,而對手只係純做反應。去到香港電視,其實你知道都係同一班人,但多咗時間可以同編審溝通,因為佢哋主張導演要學習編劇技巧,真係會上堂,因為寫完之後拍唔到都係無用嘅,所以導演要學習編劇,而編劇要去上導演堂,要知道寫咗之後拍唔到咁點算呢?而我哋演員同編劇多咗溝通,以前望住劇本,會覺得講唔出口喎,但喺香港電視,編劇會喺現場跟進,我可以反映講唔出口喎,然後即時修正,我覺得係一件好事。其實大家都係在職培訓,我鍾意有進步。」



鍾意自由不結婚

多年前拍港台的《忌廉溝鮮奶》而認識男友,二人拍咗拖近四十年,不過,陳安瑩冇諗過要結婚,最緊要有自由,「係有一個幾穩定嘅,咪就係得呢個幾穩定嘅,但係又處於膠着狀態,意思即係都可以算係男朋友,不過本身又無打算生小朋友,又無特別想做嘅事。喺感情方面我有一個見解,就係好似單車軚咁樣,年輕時前後軚一樣,大家就可以同步向前;到年紀大啲,可能其中一條軚漏氣,但仍然喺同一架單車上一齊轉動,但係有條軚漏咗少少氣,有條軚無漏氣,就係咁嘅情況。呢個狀態我又覺得OK喎,所以就繼續落去。我唔覺得有需要俾咩嘢名份。」



還有賺錢能力

樂天知命嘅陳安瑩,因為屋企問題賣咗間養老屋後租屋住,而家咁嘅市道少咗好多拍嘢嘅機會,冇得演戲就走去做配音員,賺嘅錢足夠養自己。「以前有自己物業,而家只係租樓,因為屋企問題所以賣咗樓,所以轉咗租樓,不過仲應付到我已經覺得非常好,阿Q啲真係比較好。本身以前都有做過配音,以前係Dubbing artist,而家就可能兼任Dubbing Director。都有從事配音,或者負責寫稿,因為例如一套配音劇,都要寫份稿出嚟俾人配音,所以我仲有呢方面嘅賺錢能力。另外仲有一啲北上商演,而人生中仲有搵朋友食飯、飲茶,同埋去吓旅行,每一日都非常充實,就算瞓足一日都可以係一個行程,因為你都知道我哋呢一行,有時候連瞓覺時間都無,可以瞓足一日嘅話都非常開心,所以日日都咁開心。」



配音員收入不高

不過配音收入就唔係幾好?「收入唔係好高。另外你要明解一件事,等於拍戲一樣,配音工作都唔會一日完成六十四集劇情,都要分開嚟配。你係一間配音公司,我俾你一套二十六集日本片,你要搵人試音、寫對白,都需要時間。仲有一樣嘢唔好忘記,你要配好二十六集,然後再開發票俾我,就算我有良心唔拖數,都要七個月時間啦。如果對方都要時間周轉嘅話,隨時由接job開始計,九個月後先至收到錢,仲要唔好死喎,如果唔係就收唔到錢。你諗吓今日所有開支,包括車費、飲食,都要九個月後先至收到錢,邊有一份工會係咁樣,你會覺得好咩?」



策劃:肥A

攝錄:黃志明、吳斯金

化妝:毛毛 @ 嫁妝

-----------------------------

【2019 區議會專題】

最齊全區議會入閘名單 互動民調

11.24 用選票重奪區議會

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情地址