< 返回
  • 【有陳真的母親節】黃伊汶:只要盡力,已經係個一百分嘅媽咪
  •   9,667 views │ 2018年05月09日
    留言()

 

「有咗陳真,多咗個小朋友喺身邊,就多咗一重身份,以前淨係女同新抱,而家就自己都已經係一個媽媽嘅身份,當然個心態同感受,你覺得個人喺處理各方面嘅事情,絕對係成熟咗好多,喺有咗小朋友呢兩年我覺得最大嘅轉變,原來媽媽真係可以係一個Superwoman,呢個係我好深嘅感受。」黃伊汶14年同陳國坤結婚,16年生咗陳真,囝囝嘅出現,令Emme變咗好多。「以前做女、做人老婆嘅時候,好多時個責任都只係照顧好自己,但而家個責任係要照顧另外一個小生命,有好多時發現原來自己可以拎住十袋嘢,幫佢買完呢樣買嗰樣,去商場買晒個仔需要嘅嘢,再眼瞓都好,可能夜晚好夜瞓,朝早都要逼自己起身同佢返學,照顧佢嘅起居飲食,我諗以前未必有呢個毅力,以前無諗到自己可以有呢種毅力,但原來當你對住一個小朋友嘅時候,你會好有呢個毅力去做到,一啲以前認為自己咁freestyle嘅人生未必會處理到嘅事,但原來為咗小朋友你係會願意作出呢個改變。」

Emme盡量每晚都會為陳真沖涼,希望囝囝瞌埋眼之前見到嗰個係佢,唔知佢覺得自己係個幾多分嘅媽咪呢?「有時都同啲朋友傾偈,講開覺得自己係幾多分嘅媽咪?我話其實只要有盡力,我覺得就已經係一個一百分嘅媽咪,好多人都會比較呢個媽咪俾到啲乜嘢小朋友,嗰個媽咪俾到啲乜嘢,其實每一個媽咪能夠俾到小朋友嘅,只有媽咪同小朋友最清楚,我覺得凡係有盡力地去為個小朋友,投入過去照顧佢,你就係一個一百分嘅媽咪,因為呢個世界有太多唔同嘅環境,唔同嘅機遇,唔同嘅時候,唔同嘅生活狀況,我覺得每一個媽咪都一定係會願意,俾晒自己所有嘢個小朋友,我而家開始get到呢樣嘢,我雖然未可以犧牲自己定係點點點,但我相信若果真係有啲乜嘢事去到嗰步嘅話,都一定會以小朋友為先。」

唔知兩歲大嘅陳真,有冇對Emme做過一啲好窩心嘅嘢呢?「有呀,每一晚慣例就係沖完涼,就講故事,同佢講完故事就會將佢放落床,佢就開始飲奶時我就會播音樂,佢就會瞓覺,我買咗呢個小木琴返嚟之後,每一晚佢飲緊奶嘅時候,我就會坐喺床邊地下,彈一首佢好鍾意嘅歌俾佢聽,陳真好奇怪,唔知點解佢好鍾意《You Raise Me Up》呢首歌,每一晚都彈一次俾佢聽,佢就會瞓。點解我開始覺得佢有思想,就係前晚無彈到,佢而家講嘢未係好叻,我擺低支奶之後就行番出去熄燈,因為陳真好叻晚晚都係自己瞓覺,我行到出去開門走嘅時候,佢就同我講:「媽咪,彈呀!」就噏咗呢兩個字,我就覺得你竟然講到呢兩個我從未聽過嘅字,OK我就彈啦,嗰晚彈完嗰首大會指定歌曲後,就自己makeup咗啲melody,譬如「I love you 陳真」咁嘅melody,我發覺佢飲飲吓奶抹眼,我話陳真你做咩事?佢流晒眼淚,我問佢做咩事?你係咪好感動?佢就同我點頭,開始發覺原來佢開始有情感,因為每一晚臨瞓前我都會同佢講I love you goodnight,雖然佢唔係話對呢個字有好深認識、好感動,但係嗰一下佢喊,我就開始發覺原來佢已經大個,佢知道咩嘢叫做我愛你,呢一下我就覺得係幾感動嘅。」

採訪:肥A

攝錄:蕭敬漁

化妝:Yannes Lee @ ndnco.co

髮型:Zap@ private I

場地提供:J’s Bar Bistro @ 帝苑酒店

立即按此連結Download《壹週刊》: https://goo.gl/NVySCK
熱門新聞
  • 【每日壹爆●艷星風光背後】落難時做過麥當勞大家樂 鄭艷麗: 清潔阿嬸我都做(足本版) 111,650 views
  • 【家有魔鬼僱主】有片慎入僱主狂鬧10分鐘 外傭含淚爆魔鬼家規(足本版) 86,376 views
  • 【藝員失婚失業打不死】忘記老公家中荒唐搞女 50歲黎海珊素顏孖男伴出街睇戲 (足本版) 84,187 views
  • 【暗寸姣婆亞姐】被萬綺雯搶走呂頌賢 傳黎海珊入廠掌摑小三(足本版) 69,028 views
  • 【惡男亂泊車】為接女友泊巴士站釀塞車 惡男仲要爆粗兇人(足本版) 64,660 views
  • 【為支飲管爆SEED】西裝惡男大鬧麥記 店員企硬氣走:你慢慢企!(足本版) 63,122 views