< 返回
  • 【劇本是這樣傾成的】 謝霆鋒同王晶一路打game一路傾劇本
  •   3,156 views │ 2018年06月09日
    留言()

 

上個禮拜嘅《鋒味前奏》講到霆鋒戶口試過一百蚊都冇,夠晒貼地。今日(9日)一集就講吓究竟有幾貼地。霆鋒講過,以前嘅自己係好自閉,唔想同人溝通,同佢一齊主持節目嘅導演火火就問咁而家嘅霆鋒仲係唔係咁呢?霆鋒話:「而家嘅我都係好宅,我諗我三個禮拜唔出街絕對冇問題!就算出最多都係買餸,如果有人幫我買嘅話,就一步都唔駛踏出家門。」霆鋒仲話喺北京嘅話,一個禮拜四至五日都係去街市、超市,「我鍾意企喺度發吽逗,其實我好享受嗰種寧靜。」

咁鍾意宅喺屋企,火火就同霆鋒嚟個快問快答,火火講一連串香港地方名,睇吓霆鋒有冇去過。首先係赤柱大街?霆鋒話:「梗係有啦!我以前住過嗰邊㗎!」青衣戲棚?「拍戲可能有,之後就冇。」女人街?「一定有去過,可能好細個囉。」新都會廣場?「未去過,我聽過個名,但唔知喺邊度。」動植物公園?霆鋒尷尬咁笑,「我未聽過。(火火問:兵頭花園你有冇聽過?)冇啊。」

雖然霆鋒嘅答案有啲出人意表,但係原來佢又會蒲啲好貼地嘅地方,好似深水埗同灣仔機舖,真係估佢唔到,「會去黃金商場買game,十零歲嘅時候我會落去機舖打機,到廿零歲都有,嗰陣時入咗行啦。我會企喺打機嗰個人隔離跟機,等佢打晒擺喺機上面嗰楝錢。我會翹埋對手,望住佢,一副好唔耐煩嘅表情,要俾佢知道:『你打得麻麻哋呀,快啲起身俾我打啦。』咁嗰個人就翹番對手擰轉面望住我,哈哈。」

不過最搞笑就係導演王晶會落機舖搵佢一路打機一路傾劇本,「我以前去得一間最多嘅機舖喺灣仔英皇道對面,而家變咗個超級市場,落地底,幾千呎㗎!嗰陣時打足球game。阿王晶導演要嚟搵我,擺一袋遊戲卡喺度,嗰陣時我哋就係一路打機一路傾劇本㗎啦。個情況就係,佢問:『咁你拍唔拍啫?』我:話『⋯⋯好吖,拍呀,仲有邊個呀?』『咁幾時開呀?』但我哋對眼係一路望住個mon,隻手不停㩒掣,嗰陣時我哋係咁樣傾劇本㗎。」
熱門新聞
  • 【新移民呃綜援實況】月入3萬歐洲旅行 老闆:佢哋富貴仲幫仔女買樓(足本版) 132,232 views
  • 【42歲焦媛離奇暴瘦】街頭呆滯落晒形 焦媛驚變人乾:樂觀正面應戰(足本版) 127,291 views
  • 【獨家〡30億嫩妻半島富貴sweet】何艷娟放電嗲爆老公 吳志誠扮後生冧妻(足本版) 87,254 views
  • 【獨家斷正〡千語BB伴遊】濕身透bra跟富三代上樓 愛巢對正林峯屋企 (足本版) 68,921 views
  • 【20年父女戀】一生人得高志森呢個男人 焦媛坦白:我有戀父情意結(足本版) 63,699 views
  • 【貿易戰有生機】被遺忘的港產電視機 本地薑無奈: 大家寧願俾多兩倍錢出去買 62,056 views