< 返回
  • 中環寸嘴》全香港復活包死得!
  •   6,363 views │ 2018年04月07日
    留言()

 

好耐無去半島酒店入面間Gaddis,復活節同啲老友去update 吓、食個晏,睇吓啲復活節 氣氛褪色成點,結局係以為去咗半島training School!一坐低,見啲麵包款色已大跌watt,食慣四款家陣得兩款。最失望係問條中歐鬼佬經理,有無Hot Cross Bun應吓節, 佢一句彈埋嚟「No!」咁就行咗去,連隔條街嘅澳洲牛奶餐廳嘅服務都比佢好呀,自出娘胎以來,未見過五星級酒店有咁嘅答案。

唔知係咪新人事新作風,仲好多紅酒新規矩,家陣唔准客人帶酒來,成個wine List無晒啲中價酒。我老友order客龍蝦湯,見waiter遞上來係好大煲,足夠兩人份量,心中暗喜之餘差不多想叫佢原煲放低,點知老友話唔夠熱,唔「彈鐘」都唔得,計我話個湯較錯份量就真,加熱後再上枱時份量就剛剛一碗啦!我同waiter講,樣樣嘢好似面目全非咁,佢話得閒可以向酒店方面反映。唉 投訴就無謂啦,睇佢酒店嘅方針都係服侍大陸豪客,得個貴字!睇個wine list無晒啲中價酒就知!

好彩有個assistant manager阿Kay剛剛巡場,由酒吧落嚟同我打招呼,咁先開心番啲,見佢派新咭片升咗級即刻笑佢鼻哥「鴻運當頭」(註:鼻哥爆粒大暗瘡) 搞吓氣氛大家開心。佢見我開咗支1996嘅紅酒就同我講:「楊生,你一支四個人邊度夠飲呀?」嘻,見係佢咋,咁就由佢recommend多支啦,咁我張單就五位數字啦。我老友即席向佢取吓威士忌酒經,見佢答得頭頭是道,仲撲上樓攞支1968威士忌來講解,叫做有返些小半島應有嘅 服務態度 啦。阿Kay仔,原來喺瑞士留學又MBA,不過我都櫈佢可惜,調咗去半島個酒吧度做,嗰個架部最多逐pat逐pat威士忌賣,正所謂「英雄被困筲箕灣」!
Kay 仔識得上樓去個Bar 揾支1968年嘅威士忌嚟,解答我老友疑問。
呢餐飯計埋兩支紅酒,埋單過萬銀,但Gaddis 嘅服務我唔係咁開心囉,有排都唔使旨意我再來。
熱門新聞
  • 【每日壹爆●艷星風光背後】落難時做過麥當勞大家樂 鄭艷麗: 清潔阿嬸我都做(足本版) 109,528 views
  • 【藝員失婚失業打不死】忘記老公家中荒唐搞女 50歲黎海珊素顏孖男伴出街睇戲 (足本版) 83,179 views
  • 【暗寸姣婆亞姐】被萬綺雯搶走呂頌賢 傳黎海珊入廠掌摑小三(足本版) 67,718 views
  • 【惡男亂泊車】為接女友泊巴士站釀塞車 惡男仲要爆粗兇人(足本版) 64,222 views
  • 【為支飲管爆SEED】西裝惡男大鬧麥記 店員企硬氣走:你慢慢企!(足本版) 61,776 views
  • 【明明有老公】陳自瑤心酸湊女疲倦 死守因為王浩信玩三招箍煲 (足本版) 58,236 views