< 返回
  • 【爆酒吧暴利內幕】一支Vodka$40蚊開到50杯 價錢提高幾十倍勁好搵
  •   294 views │ 2018年07月01日
    留言()

 

足本版精彩內容,請點擊以下網址:https://bit.ly/2Ks7bx7

最近世界盃,最旺梗係酒吧。咁其實酒吧點賺錢呢?

(1)先講出牌。酒吧同食肆牌好唔同,食牌係跟地方,酒牌係跟地方同跟人。跟地方係因為啲居民有機會就住個地方嘅政府租契、入伙紙、大廈公契等反對你酒牌嘅申請。跟人係因為個申請者必定要有兩年以上酒吧管理或者五年以上酒吧工作嘅經驗,同埋過往無差或刑事紀錄才可以申請。而做食肆,就乜嘢人都申請得。

食牌攞咗之後持牌人可以唔出現,但酒吧持牌人必須親自管理,見到啲人飲醉咗酒,唔可以再賣酒畀佢。酒吧內唔可以亂咁俾人跳舞,因為跳舞係需要另一個叫做公眾娛樂場所牌照㗎。唔可以舉行任何博彩遊戲,費事啲人飲到醉,輸咗身家都唔知。

(2) 賣乜酒最賺錢? 賣紅酒/白酒,一般每支行規都係markup三/四倍。來貨$150,就賣$500。支裝啤酒賺再多啲,markup 678倍。來貨價幾蚊支。例如嘉士伯,六七蚊支,分分鐘就賣四五十蚊支,甚至乎再貴啲。睇間吧地段係邊度。 嫌唔夠多?賺得最多應該係Spirit烈酒,即係酒精濃度較高嘅酒,例如Vodka, Rum, Gin, Whisky, Brandy, Tequila等。一支Vodka成本可能$40蚊支,加啲七喜加啲冰可以開到50杯,你計計數啦,成本可能得嗰一兩蚊,就賣你50/60蚊杯,markup 幾十倍你話好唔好搵?

最冇錢賺係乜? 好多人都唔知,就係draft beer生啤啦。來貨價每一keg即係每一桶酒就千幾蚊,開到大約50杯,最衰嘅就係一開咗就要兩日內飲曬, 如果唔係好易變壞, 經常揼, 好嘥。成本已經二三十蚊杯,happy hour分分鐘買一送一,即係等於冇錢賺。近年好興嘅手工啤酒Craft Beer成本仲貴,唉,靠佢賺錢真係一殼眼淚。所以下次你去酒吧時,如果老闆係你個friend就幫親佢飲多spirit烈酒rock多幾rock喇。

(3) 殺手鐧。酒吧有兩種,一種叫清吧,另一種叫花吧。清吧就齋飲酒,花吧,顧名思義,就俾啲較花心嘅人去,即係可能有女仔陪。陪得你嘅,好似世界杯咁呀,都係不同國籍,乜嘢顏色都有。我聽朋友講㗎咋,我未証實過。千祈唔好諗左去第二度,呢啲係完全合法嘅。見你一個人咁寂寞喺個酒吧到,位異國風情嘅女士就陪你傾下計,坐得低冇理由佢冇嘢飲呀。佢咁有Taste,常都想你開返支champaign同你慢慢傾。一開就每支閒閒千五/二千蚊,鐘意嘅,再搵多幾位喺度陪你盡訴心中情,一齊睇世界盃唔知幾威,飲下飲下分分鐘過萬蚊離場。

咁佢哋袋乜?每支champaign佢哋可能就拆大約五六百蚊commission間酒吧俾返佢。你又飲得開心no strings attached,酒吧有開多幾張貴價單,班女仕又交下朋友賺下外快回國,三贏呀。再有冇其他想像空間,你自己諗啦!我都係聽朋友講㗎咋。

大家都係搵食姐,酒吧唔易做。晚晚畀啲客對,分分鐘攞條命出嚟博。錢,記住你要俾人賺呀!

撰文:李根興
熱門新聞
  • 【住豪宅劣質生活】呎價2萬5上層床下層客廳 住客:我都在死忍(足本版) 235,559 views
  • 蔣雅文遠走台灣做基層 捱到永久失眠|斷捨離香港 101,731 views
  • 【曾是180磅肥師奶】50歲李婉華身體出事 咬緊牙關減走70磅變索媽(足本版) 89,473 views
  • 【惡魔菲傭嚇死我】誘爬露台摸下體想動刀 9歲女:佢想殺死我(足本版) 74,104 views
  • 【五層樓港女評廢青】港男無料扮四條 港女曾上游:傾好條件至一齊(足本版) 70,026 views
  • 【45歲生日有花收】結婚10年一樣恩愛 張晉難忘蔡少芬三次拒愛(足本版) 61,727 views