< 返回
  • 譚仔戰升級》五弟首開腔 大反擊:三哥話要分家
  •   32,289 views │ 2016年06月23日
    留言()

 

本刊早前報導,深得「廢青」網民喜愛的兩間譚仔米線,本是同根生的譚氏兄弟鬥得難分難解。其中「譚仔三哥」老闆譚澤群高調亮相,大談日賣五萬碗米線的彪炳業績。相反對家「譚仔雲南米線」東主、五弟譚澤均,多年來都無接受過傳媒訪問,直至本刊報導刊出後,五弟決定首次開腔,大談當日分家的來龍去脈。他聲言八年前是由三哥提出各行各路,但在雙方傾談分家期間,三哥一方一馬當先在大陸註冊譚仔商標,此後五弟北上發展處處碰壁,至今未有在大陸開業。

譚仔兄弟戰,原來燒到強國。

本刊的「譚仔兄弟激戰」報導引發網民熱議,五弟當然知道,「同事話連佢啲朋友都討論。」五弟覺得事態嚴重,決定與拍檔兼姐夫周志明一同亮相:「過往我冇出來講,因為我希望關係仲可以修補,唔想再搞爛。」如今他已去到忍無可忍地步,決定企出來為自己辯護,並出示當日分家的會議記錄。

兄弟爭拗

○三年,四人註冊成立「同心飲食有限公司」準備開分店。同心成立後,譚仔生意愈做愈旺,為何要分家?五弟聲稱有幾個導火線。首先,○七年,譚仔在觀塘開第九間分店時,他和姐夫全力為開新鋪做準備,曾經多次邀請三哥和六弟落鋪視察及俾意見,但兩人未有現身。直到開張當日,「六弟一嚟到就話要停工兩星期,覺得廚房設計唔啱心水,要裝修佬夜以繼日改。」姐夫為自己的設計解畫:「之前其他鋪都用咁嘅設計。」五弟則認為:「係溝通問題。錢損失唔係最重要,但我真係有邀請你俾多啲意見,點解事前唔傾好?」

之後又發生租務問題,令兄弟間裂痕加深。五弟稱,同年三哥和六弟未經他和姐夫同意,以每月三萬多元租了石硤尾巴域街地鋪並簽約:「嗰間鋪話千四呎,但用到嘅地方唔夠五百呎,係一個好大失誤,以往搵鋪要通過四個人,因為牽涉五、六年租約,錯咗可能好大件事。」

決定性的爭拗在年尾發生,四人在一個會議上,三票贊成溫和加價,只有六弟認為要大幅加價。五弟指,投票通過一週之後,六弟又召四人齊集元州街麥當勞:「目的係要推翻投票決定。」五弟即時沉不住氣說:「如果咁,以後即係你話事咪得囉!」五弟稱,當時六弟回敬一個極侮辱性的動作,但他「唔想形容」。眼見會議無法進行,姐夫即時拉走五弟,三哥則站在六弟一邊。五弟說:「佢一向咩事都係六弟啱,三哥係冇主見嘅人。」

決定分家

眼見兄弟間矛盾加深,五弟想了一個禮拜後,想出一個辦法讓公司繼續運作:「既然佢哋等於一組,我同姐夫又夾得幾好,不如將公司十二間鋪頭,分開兩隊管理,各自做好,對方有好嘅嘢,互相學習,但利潤歸總公司。」姐夫將建議轉達給三哥和六弟:「講完好似石沉大海。」

但事隔一兩個月,○八年農曆新年後,三哥約開會,五弟引述他說:「佢哋話唔係『分管』,係要分家,佢哋已經安排好晒,同咗啲員工講好:『你到時跟我,一分開就辭職。』」資料顯示,三哥和六弟在○八年二月初,聯同其妻,成立群順有限公司,及後處理分家事宜,亦以該公司名義進行。

決定分家後,五弟聲稱,三哥曾提議將「同心」解散,但五弟和姐夫認為公司名是父親所選,有紀念價值,故二人決定留在「同心」,繼續經營「譚仔雲南米線」。三哥早前解釋為何未有留在同心時說:「因為現實同個名相反,唔再同心。」

三哥一方曾多次暗示,當日分家與兄弟間的錢銀爭拗有關。六弟曾向本刊說:「我同三哥從冇因為金錢發生爭拗……但同其他所謂兄弟就有,既然道不同,不如各有各做。」但五弟就否認是因錢銀問題而分開。

對於五弟的說法,本刊曾邀三哥受訪,但他透過公關表示不欲再談。記者之後以書面查問也不獲回覆。

撰文:關冠麒

攝影、攝錄:胡智堅、葉漢華、李育明
「譚仔雲南米線」老闆、五弟譚澤均首次受訪。他說,開米線鋪之前,三哥和他的關係很好,除一同經營家族的冶金工場,還會一起食煙、飲酒:「以前仲會兩對夫妻一齊返大陸搵好嘢食。」當年的手足情,已成歷史。
三哥譚澤群談到兄弟時,曾強調自己不會計較:「我對外人未必,但對屋企人,我搓得圓㩒得扁。我讓,讓得幾多讓幾多,讓盡。」
五弟的「譚仔雲南米線」,鮮黃色膠碗印有譚仔「倒轉腳印」商標。五弟記得,第一批碗在○八年分家前預訂,到出貨時,譚仔已經變天。
與三哥同一陣線的六弟譚澤強(圖),被五弟形容為:「佢一直好鍾意揸主意,相信『譚仔三哥』話事人,係細佬。」
熱門新聞
  • 【呢世最憎周潤發】曾經沉迷嫖賭飲 吳孟達嬲爆周潤發唔借錢(足本版) 156,100 views
  • 【黑幫14K操控】一條街十幾個妓女 元朗企街狼招拉客極擾民(足本版) 149,309 views
  • 【監獄膳食黑幕】監獄廚房係油水位 江湖大佬可分多2隻雞翼(足本版) 123,237 views
  • 【捱過杜汶澤婚外情】田蕊妮死守19年 俾老公用100蚊搞掂:我好崇拜佢(足本版) 104,841 views
  • 【鬧市下體現形】同林峯翻撻無望 千語BB暴瘦變紙板人 (足本版) 81,305 views
  • 【何志平種錯生基出事】富豪御用風水師爆料 何志平信錯師傅:佢難逃一劫(足本版) 74,412 views