< 返回
  • 馮檢基唔做plan B 泛民中人憂破壞機制
  •   6,411 views │ 2018年01月23日
    留言()

 

民協馮檢基喺泛民九西初選落敗後,星期一(二十二日)召開記者會,宣佈唔會做民主派初選嘅Plan B,假如姚松炎被DQ入唔到閘,按機制應由初選排第三嘅民主黨袁海文補上,強調要維持程序公義,呢個係民主派嘅共識,毋須外界討論。

被揶揄係「政壇關愛座」嘅基哥表明,今次決定係「退一步海闊天空」,避免民主派分裂。但有民主派中人認為,事件顯出泛民陣營嘅嫌隙,可能造成一定嘅反效果。事關初選結果前後,都有指如果姚松炎入唔到閘,都唔應該由基哥出選,呢個建議令唔少人不滿,認為係唔尊重機制甚至民主,咁仲點自稱民主派?

該名民主派中人指出,依家反對基哥做Plan B嘅人,又點會支持得票更低嘅袁海文。而政界亦有消息話,有資深民主派成員開過會探討,係咪由重量級民主派前議員擔任Plan B,討論人選包括公民黨梁家傑、余若薇,工黨李卓人,甚至民主黨創黨主席李柱銘等。今次風波,可能會令投咗票嘅選民,對初選機制失去信心。

民主動力就話尊重基哥決定,會同簽署咗初選備忘錄嘅持分者開會商討。袁海文認為根據初選機制同備忘錄,基哥應該係Plan B,對佢嘅決定感到意外。佢理解事件令人產生初選機制被破壞呢個觀感,或者被市民見到泛民陣營有嫌隙都唔出奇。佢唔願意見到初選機制被衝擊,會先同民主動力同民主黨開會,再作決定。
基哥喺記招上,引用民主黨已故元老司徒華講過:「成功不必我在,功成其中有我。」佢宣布唔做planB,但場風波係咪咁就平息到呢?
DQ六之一嘅姚松炎勝出泛民初選,三月會參加九龍西立法會補選,但有傳佢可能會被DQ入唔到閘。
熱門新聞
  • 【42歲焦媛離奇暴瘦】街頭呆滯落晒形 焦媛驚變人乾:樂觀正面應戰(足本版) 125,432 views
  • 【港女冧爆強國男】跳舞撒嬌服侍大陸佬 港女憑直播想買車買樓(足本版) 78,070 views
  • 【獨家斷正〡千語BB伴遊】濕身透bra跟富三代上樓 愛巢對正林峯屋企 (足本版) 68,277 views
  • 【20年父女戀】一生人得高志森呢個男人 焦媛坦白:我有戀父情意結(足本版) 62,502 views
  • 【貿易戰有生機】被遺忘的港產電視機 本地薑無奈: 大家寧願俾多兩倍錢出去買 60,374 views
  • 【每日壹爆〡老董家族平價霸地】每月1萬蚊霸8萬呎地 淺水灣靚官地變董家骨灰龕 48,132 views