< 返回
  • 【金像奬】曾患抑鬱症住院 《黃金花》導演:院友似《回魂夜》
  •   7,261 views │ 2018年04月15日
    留言()

 

陳大利,37歲,《葉問》系列、《狂舞派》、《西遊記之大鬧天宮》編劇。2004年憑短片《媽》獲第十屆ifva 比賽公開組金獎。新作《黃金花》獲提名香港電影金像奬最佳新晉導演。



 

陳大利為拍《黃金花》做了大量資料搜集,與演員多次拜訪有自閉症孩子的家庭。戲中兒子高興時與媽媽親吻、暴怒時打自己,都是從現實中取材。如果他要拍精神病院的故事,應該不假外求。他曾經因為抑鬱症,在精神科病房留醫一個月,「有機會一定會拍。其他人冇咁主觀的經歷。」



 

0三年畢業的人特別倒霉。失業或低薪,to be or not to be。陳大利曾經在TVB廿四小時新聞台待了一年,在錄影廠撳掣,「就係趙海珠、林燕玲做主播嗰期。好重覆、好厭惡。」殮房般的錄影廠雪不死他的創作力。0四年,他首部有份編劇的 《墨斗先生》上畫,短片《媽》又獲得ifva 比賽公開組金獎,他高興得要辭職。「但之後冇嘢做,一路都冇。」「仲要攞咗奬,覺得自己唔係冇能力,但又冇機會,懷才不遇。點解要咁呢?」貧困之餘,又懷疑電影工業容不下自己對電影的熱愛,「價值觀開始出現問題。」有一日,他不支倒地,被送入醫院,確診抑鬱症。



 

沙田醫院精神科是個大觀園。院友很嘈,無所事事行來行去,拖鞋聲踢踢踏踏此起彼落,「佢哋個個都好獨特。」 有人會夢遊,有人一遇到問題便會倒後行。受藥物影響之餘,院友們也互相影響,「好似《回魂夜》的。有個人好唔舒服、發作時,佢對面床嗰個就會好精神。呢個有問題時,嗰個又起番身。好有趣。」陳大利則受自己看過的電影所影響,「因為中秋,有好多燈籠。見到月亮好圓,突然間覺得自己係咪變咗人狼。你唔會好似變咗隻狼咁走嚟去,我就咁瞓喺度諗。」



 

出院後,陳大利繼續覆診,「醫生話,其實抑鬱症好普通,只係少咗一種血清素。好似你胃痛,係因為胃酸多咗。」醫生的輕描淡寫令他放鬆不少,「好似經歷咗生死。」一年後,醫生宣佈陳大利不用再食藥。「嗰段時間我成日跑步。所以跑步喺《黃金花》成日出現,其實係我來的。面對困境,我想說的是振作。」陳媽媽因為兒子「撞邪」擔心不已,「我媽落去坐吓,我喺公園繞圈跑。」「佢無條件照顧,慢慢感受到母愛很偉大,其實爸爸都一樣。所以親情我會睇得好重。」靈魂和肉身重新合體,陳大利重回正軌,「繼續做我想做嘅嘢。喺度等、做吓創作,冇嘢做時拍吓短片。有人搵你寫劇本就舉手做。慢慢等到《葉問》&《狂舞派》,都係嗰時寫的。」

熱門新聞
  • 【港大俊男毒招玩女】氹多名港女上床SM虐打 仲逼女碌卡借錢供養(足本版) 263,601 views
  • 【20億身家俾晒利智】愛到貼地29年因一件事 李連杰:我願意為她付出生命(足本版) 121,741 views
  • 【剝一隻牙人生逆轉】港男剝牙昏送ICU變癱 醒來身殘失業妻自殺(足本版) 115,080 views
  • 【港女冧爆強國男】跳舞撒嬌服侍大陸佬 港女憑直播想買車買樓(足本版) 74,216 views
  • 【千億富豪追求】賭王一舞傾倒 邵逸夫介紹 南豐陳廷驊利智傳緋聞(足本版) 71,360 views
  • 【兩歲細女爭寵贏阿哥】放假變湊仔公 陳豪偏心錫晒小公主 (足本版) 63,588 views