< 返回
  • 【wONdEr|月巴氏】重看《暗花》:宿命之下,我們都只是被控制的彈波
  •   2,785 views │ 2018年07月11日
    留言()

 

二十年前,我是《蘋果》副刊的澳門食版記者。

不因為我月巴,也不因為我成日過大海(當時的我根本從未去過澳門使過葡幣),而只因我只是部門裡的一個彈波,彈去邊、幾時停,都唔到自己話事。

同組冇一個同事肯去。那一年(我們透過香港傳媒所能接收到)的澳門離不開:黑幫Keep住火拚,除了槍,有時甚至出動埋炸彈呢一類大殺傷力武器,總之,唔係你死都要你亡——畢竟冇人想自己被隊冧。

偏偏身不由己的我,每個禮拜都整定有三、四日留守澳門。你話唔淆就假。

淆的,還有基哥。基哥,澳門大佬,同另一大佬佐治展開長達八個月的火拚都未淆過,偏偏一提起「洪先生」這名字,竟然在自己頭馬阿琛面前顯露前所未有的淆

江湖傳聞一:「洪先生」要出手整治唔聽話的基哥與佐治。

江湖傳聞二:基哥出五百萬暗花買起佐治。但基哥明明冇做。

阿琛相信,只要捱得過呢一晚,就一天都光晒——呢一晚,匿藏海外的佐治將會返去澳門,他務必確保佐治能安全到埗,以便同基哥四四六六拆掂佢。

定過抬油的阿琛不明白基哥淆乜。在阿琛的認知裡,「洪先生」只是一個好多年冇返過澳門的老嘢——一個半隻腳叉咗入棺材唔知惡得乜嘢出樣的老嘢。

但阿琛勢估唔到,連自己都開始淆起來。在那山雨欲來的一天,正職是司警的他遊走於澳門大街小巷黑白二道,去趕走佢睇唔過眼的人,去嚴刑拷問他眼中形跡可疑的人,去阻止基哥個不肖子阿榮隨時發癲殺人 直至他遇上了一個從未見過的人,耀東。

怪事接連發生在阿琛身上:

1. 屋企突然出現了一條無頭男屍;

2. 有二五仔爆響口話出五百萬暗花買起佐治的人正是阿琛;

3. Office張枱底下無端端多咗一袋鉅款;

4. 日日跟出跟入聲都唔多滴的下屬竟然是別人派來監視自己的

阿琛一直以為命運掌握在自己手中,點知原來自己由始至終都只是一個彈波。「彈去邊、幾時停,都唔係自己話事。」耀東咁講。

但阿琛不甘心只做一個被掟來掟去的波,他要為自己條命搶回主導權。

記得二十年前我是在沙田娛樂城的戲院(現在已改建成教會)看《暗花》,成場觀眾加埋帶位,廿人都冇。那是香港電影最低迷的一年(但之後更低迷),買飛前,我不知道負責製作的「銀河映像」由誰創辦,不知道創辦背後的緣由,甚至不知道導演一欄寫住的那個「游達志」是誰(後來才知道真正導演是杜琪峯),而只知道:我鍾意睇梁朝偉和劉青雲做戲,我依然鍾意睇香港電影,於是,買飛,入場。

在那個香港電影低迷的年份,在那個香港電影被批死為爛片(是的,啲人未睇已預知是爛片)的年份,《暗花》讓我知道,香港原來還有電影人不甘心做個沒意志的波,用心、用意志,去拍一齣借用澳門黑幫仇殺卻不止於渲染黑幫仇殺、反而交代了一場人逃不出宿命的悲劇——二十年前,這種宿命只能成為一齣乏人問津的戲,二十年後,卻與我們形影不離。

甚至連生於斯死於斯都不能。我們隨時被彈晒去大灣區。

專欄作者簡介:

月巴氏

敬愛林振強。看了過百次《東邪西毒》和《一蚊雞保鑣》。沙田友。

Facebook專頁:

https://www.facebook.com/fatmoonba/

探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk/
熱門新聞
  • 【住豪宅劣質生活】呎價2萬5上層床下層客廳 住客:我都在死忍(足本版) 202,321 views
  • 【家有魔鬼僱主】有片慎入僱主狂鬧10分鐘 外傭含淚爆魔鬼家規(足本版) 161,500 views
  • 【每日壹爆●艷星風光背後】落難時做過麥當勞大家樂 鄭艷麗: 清潔阿嬸我都做(足本版) 115,181 views
  • 【藝員失婚失業打不死】忘記老公家中荒唐搞女 50歲黎海珊素顏孖男伴出街睇戲 (足本版) 86,485 views
  • 【個仔似足老豆】李琳琳老來得子 70歲姜大衛細仔只得22歲(足本版) 78,621 views
  • 【暗寸姣婆亞姐】被萬綺雯搶走呂頌賢 傳黎海珊入廠掌摑小三(足本版) 71,602 views