< 返回
  • 又要老婆靚又想禮金平|白告
  •   3,473 views │ 2018年11月09日
    留言()

 

「外母要我俾成十萬禮金呀。」呢啖苦水,阿Paul幾乎同任何人都吐過,今次一坐上阿風部Sienta,就噴到成個內籠都係。已婚嘅阿風對呢個說法嗤之以鼻:「咁你老婆咁靚,又要老婆靚又想禮金平?邊有得咁筍呀。」一邊講,一邊一手喺宏照道調頭,乾淨利落。

阿Paul語帶驚訝:「唉,老婆靚又點?KEEP到幾多年吖,你以前夠揸MR-S啦,而家咪又係轉揸Sienta。不過風哥即是風哥,三條線就夠調頭,仲爽手過以前揸跑車。」「部車迴轉半徑細啫,我老婆都揸得掂,開頭望係樣衰啲,睇耐咗都幾順眼丫。」阿風好鍾意笑佢老婆,阿Paul 都聽過無數次,笑住話:「錄咗音喇,你笑阿嫂樣衰,一陣我就報寸。」「你咪報囉!我講部Sienta咋。」唔知幾時開始,怕老婆成為咗好男人嘅指標之一,阿風都難逃宿命,對笑話都要認真。

「咁老實講你部車又真係幾樣衰,尤其係諗返你以前揸MR-S行公主道個樣。睇下你,行太子道都要行慢線,成車都係公仔,係上落車時低到似部LOW低嘅跑車咋。」阿Paul銳意批評,挑戰阿風嘅底線。「我哋去九龍城呀,梗係要行慢線啦,至於車身低係原裝設定黎,咁細路仔上落車方便啲嘛。」見到阿風有少少躁,阿Paul都唔敢出聲,阿風意猶未盡,繼續捍衛自己嘅換車決定:「你都準備結婚啦,仲咁天真又要老婆靚又想禮金平,成熟啲,我哋三十歲喇,揸車就要講實用,Sienta初頭望係有啲樣衰,但係唔止禮金平,最緊要係實用,放嘢嘅地方又多,必要時可以坐多幾個人,一家大細同外母出街都得。好似你咁仲揸部雙門去見外母,咁唔識做,梗係收貴你禮金啦。」

電話無電嘅慘叫聲打破咗令人尷尬嘅沈默。「風哥有無尿袋呀?部機無電呀。」「你真係睇嘢淨係睇外表,呢度咪有差電插頭囉。」阿風指住中控台個2.1A差電插頭,為阿Paul嘅落後感到無奈。

忽然一部林寶高速衝出九龍城迴旋處,揸得唔快但係聲浪夠大。「除非我哋咁有米,咁就唔駛兼顧實用性囉。」阿風總結完就望實右邊,大油迴旋處。「對唔住囉,唔駛攞部車發洩嘅,乜呢部嘢都咁有力嘅咩?」貼咗喺位嘅阿Paul詫異於七人車都有相當嘅加速力。「兩個人都做唔到呢個效果,點載七個人丫。好似女人咁,唔好淨係睇外表。好似你咁咩,揀個靚嘅公主,仲要籌旗俾禮金。」塞入九龍城時,阿風又趁機抽一抽阿Paul水。

「咁點算呀?我大拿拿點攞十萬出黎?」「一場兄弟,咪話我唔益你。你放咗你部車,我平平地讓呢部Sienta俾你,我自己換部新嘅。」「換車?你又話呢部好好?」「我換部新款啫,佢出咗隻薄荷綠色,老婆好鍾意,但我邊有錢丫,如果你幫我,我咪幫返你囉。」阿風古惑咁笑住講,阿Paul搖搖頭落車,幫手去後座搬書櫃。

揀車就好似揀老婆咁,又要老婆靚又要禮金平係各車主嘅理想,可惜現實之中每部車嘅優點同時係缺點,馬力大就油耗大,車身高就唔夠靈活,唯有視乎需要去揀,好在就算一時揀錯,車可以換,老婆不能換。

Toyota Sienta:

引擎 1,496.c. 直列4氣缸16活瓣引擎

最大馬力:109ps / 6,000rpm

最大扭力:13.9kgm / 4,400rpm

傳動系統: CVT無段變速自動波箱

車身 長4,260mm闊1,695mm高1,675mm

軸距 2,750mm

耗油量:20.2 KM/L

_

轉輪生活|以汽車為主的生活風格專案

_

本週精選車展:

http://bit.ly/2QvMGmb
熱門新聞
  • 【屋苑商場淫竇成災】馬鞍山師奶大恐慌 商場樓上補習樓下艷女色誘老公(足本版) 435,124 views
  • 【獨家爆做真律師】十優麥明詩考獲美國執業律師牌 一男子陪飛紐約宣誓 (足本版) 103,262 views
  • 【港人愛查另一半】私家偵探爆捉姦奇聞:男友扮踢波其實去叫雞 50,168 views
  • 【馬鞍山商場淫竇風暴】激民憤大專生挑機 艷女白骨爪施襲:我不了解香港法律 43,479 views
  • 【每日壹爆〡是男還是女】愛扮女人喜歡男性 跨性別港男:渴望被保護疼愛 42,145 views
  • 【嫩女友細40年】73歲葉振棠不言休打止痛針開騷 唱完女友即陪入院(足本版) 41,875 views