< 返回
  • 特別版的煩惱與優勢|白告
  •   4,099 views │ 2018年11月24日
    留言()

 

準時放工之後,Ryan慢慢行去停車場,雖然約咗女神,但佢無心急攞車開車,明知能夠到手而仍未到手嘅嘢,緩緩逐步拆開禮物包裝,都係一種享受。啟動寶馬M5 Competition之後,一邊沈醉於厚實嘅排氣聲量,一邊想像女神嘅喘息。

通常出去玩車時,Ryan會用DSC Off加FR嘅模式,盡情享受駕馭嘅樂趣,揸車同溝女一樣,就係有難度而克服到,將猛獸馴服嘅優越感,無幾多種嗜好可以提供到。不過,當溝女同揸車同時進行時,有啲嘢就要放棄,喺女神公司樓下,Ryan調返去DSC ON加4WD模式,M xDrive智慧型可變四驅系統就會將跑車變返地鐵,定過行路軌,對於郁啲就話暈車浪但係又唔肯坐地鐵嘅女神黎講,穩定性係必須嘅。

「你呢部Benz好靚仔呀。」女神嘅雞仔聲好嬌俏,可惜內容太低能,一心預備開餐嘅Ryan努力克制住雙眼向上反,如果眼皮同頭轆一樣有六遮卡鉗就好喇。「之前嗰部先係,呢部係寶馬M5黎㗎。」其實之前Ryan揸開嘅係寶馬3系,但係呢啲嘢無需要同女神解釋,更加唔需要強調係Competition版本,儘管頭枕暗藏M5標誌,女神只會介意張Merino真皮櫈皮味太濃。

喺赤柱海風吹拂下,作為前菜嘅晚餐無驚無險食完,飲到女神輕微醉倒,將身體一半重量交託俾Ryan,時機已經合適。M5 Competition經過廠方調校,馬力比普通版多25匹達625匹,頭先載住女神再多20匹,而家載住女神就再多30匹,直奔屋企。

藍光閃耀,係反飛車路障。Ryan 不禁暗暗咒罵,究竟澳門賽車同非法賽車有咩關係,點解成個十一月都係路障,亂咁勾堆車入去驗,中環法律界明日之星,揸住車過路障時所受嘅待遇,令一生正直嘅Ryan體驗到做賊嘅感覺:「你部車有無改裝呀?無?咁點解個側鏡係黑色㗎?鬼面罩又係黑色,尾章又黑底?知唔知我可以告你非法改裝?」好眼力嘅阿SIR,一下子將M5 Competition同普通版區分嘅外貌特徵列舉出,行內人一望而知嘅分別,喺行外人眼中就以為係非法改裝。一時間,Ryan都分唔到無法分辨Benz同寶馬嘅女神低能啲,定係將原裝當改裝嘅警察弱智啲。

「呢啲都係原裝設定黎㗎阿SIR。」權衡輕重,始終女神有蝦條,差佬無蝦條,反正女神都昏昏沈沈,低聲下氣解釋似乎更好。差佬似乎意猶未盡:「軚盤呢兩粒紅色制咩黎?氮氣加速呀?知唔知我可以告你非法改裝?」莫非呢位阿SIR睇得《狂野時速》太多?氮氣加速都講得出。「呢兩粒快速鍵黎嘅,可以自設駕駛模式組合,自己SET定驅動模式、循跡控制、引擎輸出、電子避震、軚盤轉向輔助⋯⋯」Ryan好似打官司咁,內心愈焦躁,口頭愈冷靜。「你走得喇。」阿SIR忽然打斷Ryan嘅背書,離遠見到白衫警察揮手示意放人。

「部車成球幾嘢,你截黎做咩呀?」洪渾嘅引擎聲同大SIR嘅責罵聲同時傳入車廂,一直半躺喺櫈嘅女神忽然開聲:「呢部車原來咁貴㗎?」 Ryan無回應,深深向油門施加壓力,體會過百萬嘅循跡能力,部車點踩都唔會出軌,只有人先會。

引擎型式:V型八缸DOHC 32V雙渦輪增壓

排氣量:4395c.c.

最大馬力:625hp/6000rpm

最大扭力:76.5kgm/1800~5800rpm

變速箱型式:八速手自排

輪胎規格:前275/35R20、後285/35R20

輪圈尺寸:前9.5J x 20、後10.5J x 20

車身尺寸:4966mm x 1903mm x 1469mm

軸距:2982mm

車重:1865kg

_

轉輪生活|以汽車為主的生活風格專案

本週末精選車展(11月24至25日)

http://bit.ly/2zoBBge
熱門新聞
  • 【呢世最憎周潤發】曾經沉迷嫖賭飲 吳孟達嬲爆周潤發唔借錢(足本版) 151,410 views
  • 【監獄膳食黑幕】監獄廚房係油水位 江湖大佬可分多2隻雞翼(足本版) 120,853 views
  • 【捱過杜汶澤婚外情】田蕊妮死守19年 俾老公用100蚊搞掂:我好崇拜佢(足本版) 104,227 views
  • 【黑幫14K操控】一條街十幾個妓女 元朗企街狼招拉客極擾民(足本版) 76,326 views
  • 【何志平種錯生基出事】富豪御用風水師爆料 何志平信錯師傅:佢難逃一劫(足本版) 73,905 views
  • 【心臟衰竭執番條命】66歲患糖尿困擾 吳孟達親述:自己辛苦身邊人都辛苦(足本版) 56,659 views