< 返回
  • 【港媽慘遇兩賤男】先遇無良裝修佬 再有收數佬恐嚇:佢叫我做雞(足本版)
  •   78,046 views │ 2018年10月11日
    留言()

 

一名單親媽媽,不幸地接二連三遇上騙子。一切,都是從裝修開始。

「我遇上騙中騙中騙,最初裝修師父騙我,再遇上收數騙子,兩樣均是騙局,我真係唔明香港點解依家變成咁!」裝修負責人黎小姐說。

今年4月,她透過中介公司認識裝修師傅沈先生,替其朋友裝修單位。沈的卡片,寫著祥益工程公司。這單工程,沈負責屋內鋁質工程,例如天花板、鋁質牆身、換窗和清拆。沈上門實地查看,再報價12萬,更以手寫收據形式發給客人,黎先付8萬元訂金,對方口頭承諾45天交貨,最終卻爛尾收場。

黎狠批對方毫不專業,工程接連出錯,窗戶並無安裝妥當,十分危險,「每一次只係話無錢開工,無錢揾唔到工人,間中就話生病,至今連三分一工程都未完成。」最離譜的是,裝修前必須要有工人保險、第三者責任保,但通通都沒有。

「6月19日,佢話要先攞走工具,第二個地盤要用,點知我上去,發現只剩下一對白布鞋和一包沙,全部人已離開,所有物件均已搬走。」距離交吉日所剩時間不多,黎小姐要再花12萬元,火速找人執手尾,損失慘重。

「他將我加入黑名單,無辦法揾到佢,我只知佢架車泊在大坑東邨,報警好似幫唔到手,差人私下教我去佢架車前面等,如出現就即時報警,睇下能否有個地址第日可以寄信件。」

記者前往位於荃灣的祥益工程公司,負責人黃先生直認沈是前判頭,「其實佢去年年尾已離職,我哋收回佢所有物件,當時仲有簽名作實,而我哋係唔知佢盜用公司資料,事件好困擾,我哋準備報警。」

根據沈的車牌登記,記者前往南昌邨一單位,以電話聯絡上其兄長,「我只係幫佢辦理保險和牌費,但今年開始佢已無交罰款,我去法庭檢查大約有50多張告票,仲未計呢幾天陸續寄來的數量,但他將我電話列入黑名單,我依家都唔知點算。」

單親媽媽黎小姐,不幸遇上爛尾裝修工程,求助無門,她決定在網上公開事件。

「公開事件唔係我憤怒,只係唔想再有其他人受害。」迴響很大,有近三百人回覆,多人力斥沈師傅是敗類。此時,黎小姐形容仿佛出現了一位神,所謂神就是收數王,吳先生自稱是專業收數佬,再難收的債他也能包辦妥當,「佢就似無條件幫我去收數,好有禮貌同我打招呼,叫我介紹背景,我話自己好慘,係一名單親媽媽,曾經歷一場大病。佢跟住就話平時一直收取三成行政費,單親媽媽可優惠減收至兩成。」

收數佬不停誇讚自己專業,目的求財,會按程序替事主收回款項。

黎逐提議出來見面簽合約,對方拒絕,著她先付少數訂金,「我認為無可厚非,揾人工作要俾錢先。」首天付款了5千,翌日早上來電再索錢,「黎小姐,你好,我是吳生,不好意思,你大約何時去馬會入數?因為我正安排人坐船來港替你辦事,以快打慢,早點完成任務。」

高效率讓黎小姐讚不絕口,對方聲稱已找到裝修師傅,但發生一個很嚴重問題,「佢話原來對方有黑社會背景,我唔識得分辨咩堂口、兄弟輩份,叫我要俾5千至1萬元領取欠債書,佢話說已脅持對方。我問可否列明對方身份證號碼,然後拍照,佢話我過數後就會轉發,我心諗,如果追收十萬蚊,俾一萬元訂金也看似合理。」結果順利又被氹5千元。

第三天,該名收數佬又再索錢。

「佢話已拳打對方,我話唔想傷人,擔心要坐監,叫他千萬不要毆打對方,他就話打兩拳係必需的,跟住就以粗口來形容呢種人,話佢哋識得處理,叫我放心,保證我一定會收到債項,我反問如果佢無咁點算。」

收數佬指,平時挾持港人回港,會找其父母,再挾持他前往銀行或財務公司,籌錢,此乃慣常程序。

「佢話唔入多一萬蚊俾,就唔會俾張支票我,但我話你咩相都未曾影過俾我,就連收數王的近照和屋企樓下都無相,就要求我俾兩萬元好唔合理,我問你班兄弟係唔係幽靈,佢就開始嬲。」

「我人生無法想像會發生呢件事,我揾人去收數,收數公司叫我揾大耳窿借錢,再俾錢佢,匪夷所思,收數變成借錢。」

事主拒絕再付款,收數老千隨即反面,還語帶恐嚇威脅事主,「佢話要貼我街招,叫我做雞,每晚來電叫我如廁,叮囑我外出時小心,令我有很大心理壓力。」

記者致電求證收數王吳先生,吳表示稍後會退回款項給事主,但卻拒絕回應有關收數行業事情,直至截稿前,黎小姐仍未收回有關款項。

採訪:艾馬

攝影:韋平

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結:http://bit.ly/next28app
熱門新聞
  • 【42歲焦媛離奇暴瘦】街頭呆滯落晒形 焦媛驚變人乾:樂觀正面應戰(足本版) 125,617 views
  • 【港女冧爆強國男】跳舞撒嬌服侍大陸佬 港女憑直播想買車買樓(足本版) 78,135 views
  • 【獨家斷正〡千語BB伴遊】濕身透bra跟富三代上樓 愛巢對正林峯屋企 (足本版) 68,356 views
  • 【20年父女戀】一生人得高志森呢個男人 焦媛坦白:我有戀父情意結(足本版) 62,616 views
  • 【貿易戰有生機】被遺忘的港產電視機 本地薑無奈: 大家寧願俾多兩倍錢出去買 60,472 views
  • 【每日壹爆〡老董家族平價霸地】每月1萬蚊霸8萬呎地 淺水灣靚官地變董家骨灰龕 49,685 views