< 返回
  • 【剖白喪偶哀痛】88歲劉兆銘與孤獨共舞:怕將來上去見唔番佢 我會更孤獨(足本版)
  •   64,435 views │ 2018年11月05日
    留言()

 

88歲的劉兆銘,六年前經歷喪偶之痛。

他舞蹈家出身,但人生最難學的一場舞,是老來失伴後,與孤獨共舞。

鏡頭前將角色演得極致的Ming Sir,老來失伴的剖白,也是淋漓盡致。太太生病後,Ming Sir不放心,開工拍劇也要把她帶在身邊,老夫妻從未如此形影不離,因為要珍惜餘下互相守護的每分每秒。

「因為佢會離開,會冇得愛。」

走到別離時,最錐心刺痛是愛與難捨之間的折騰。

「唔想佢死時佢又辛苦,又想佢快啲死,咁又點會同時想佢快啲死,又想佢唔死,同時想佢唔好死,又想佢快啲死,保護佢唔好死,又想佢快啲死,佢好痛苦!」他,回憶當刻的扎掙。

「冇得愛之後,佢以前鍾意打麻雀,鍾意游水,我又跟埋去游水,跟埋去打麻雀,依家又冇得游水,因為唔敢去游水、打麻雀,怕勾起好多回憶。唔見咗個人,失咗個人,失咗樣嘢,乜都失曬,失下失下連拍戲興趣都失咗,然後拍戲時佢唔再喺身邊,以前一路跟住,依家就唔喺度。因為一個好強烈嘅回憶,你先覺得係唔見咗!」

有五年時間,失去生活的動力。

「走了之後搵唔番,總係搵唔番好似佢咁 ..,所以失去咗慣性嘅嘢,而且冇得嗌交,我地以前成日都嗌交,未有一日唔嗌過,走咗冇交嗌。回憶時候,就會諗:『點解佢唔喺世界上耐啲?我地嗌交實在嘥咗,點解喺度時唔好好享受。』,無死亡無離開,就唔知個愛係咁有價值!以前佢講笑話,你咁多女朋友,可以搵番個伴,以為佢講笑,我話搵到個伴,都唔係病緊嘅伴,個病嘅人係我鍾意嘛!病到就嚟死我都仲鍾意,佢走咗我邊會搵一個,病都鍾意嘅人,搵唔到呢啲替身,佢嘅靚係由以前積累下來的靚,係一種情懷的美。」

餘下的日子,Ming Sir說仍然期待演出上給自己的發掘,笑演日落前。

「我處處都等緊做戲,唔係就黎冇氣做,呢個氣,咁咪等,又等緊自己離去,可唔可以見到嗰個人囉!咁美麗的等待,還是灰暗的等待,呢個就視乎平日你如何對你的人生。」

他對愛妻一言一詞的懷念,等待滿是孤寂。「剛才我講連想打麻雀都唔敢打,即係等待佢翻生,但又唔翻生得,咁即係孤獨囉!等到去搵佢時,佢唔喺嗰度嘅話,咁我仲孤獨囉!

「佢喺西天定東天?人地話西天,如果佢唔係上咗西天,上咗東邊嗰面,咁你咪撲咗一世喺西邊搵佢,原來佢去咗東邊。」走到黃昏,盼望的是有天跟她重聚。但又害怕,到那時候才發現天各一方。

去年佢復出拍王晶嘅《賭王群英會》,又拍咗收15億點擊嘅網劇《蝕日風暴》,演戲團火返晒嚟。問銘Sir一句,重返崗位是否已走出喪偶陰霾?「無走出過,唔會走出到。」他說。

「完了就接受緣份的完,因為接受緣份完了,就要成日記住呢種緣份,所以不能忘懷。離開才是懷念,懷念一定係極痛極悲極快樂,呢個先至係懷念,所以佢離開就對我產生極愛極悲,悲喜交集嘅記認。」

立即下載《壹週刊》Apps,隨時隨地睇盡時政專題、深度偵查、娛樂熱話!按此連結:http://bit.ly/next28app

採訪:Sukey

攝錄:吳斯金

攝影:Lawrence Wan

剪片:李威

鳴謝歌曲演繹:陳康健
熱門新聞
  • 【屋苑商場淫竇成災】馬鞍山師奶大恐慌 商場樓上補習樓下艷女色誘老公(足本版) 435,124 views
  • 【獨家爆做真律師】十優麥明詩考獲美國執業律師牌 一男子陪飛紐約宣誓 (足本版) 103,262 views
  • 【港人愛查另一半】私家偵探爆捉姦奇聞:男友扮踢波其實去叫雞 50,168 views
  • 【馬鞍山商場淫竇風暴】激民憤大專生挑機 艷女白骨爪施襲:我不了解香港法律 43,479 views
  • 【每日壹爆〡是男還是女】愛扮女人喜歡男性 跨性別港男:渴望被保護疼愛 42,145 views
  • 【嫩女友細40年】73歲葉振棠不言休打止痛針開騷 唱完女友即陪入院(足本版) 41,875 views