< 返回
  • 深水埗潮爆紙紮鋪 星球大戰都整到
  •   15,794 views │ 2015年03月17日
    留言()

 

土匪雞翼、史納莎狗仔、甚至連「人骨」都整到,這些新派紙紮製品,全部出自只有三十八歲的後生紙紮師傅歐陽秉志,他可能是陰間最受歡迎的藝術家,因他幾乎乜東東都可以整個紙紮版。清明就到,又是一眾孝子賢孫慎終追遠的時節,如先人收到適合的祭品,生者逝者,彼此都會安心。

這間至潮紙紮鋪,叫寶華紮作,位於深水埗福榮街,開業五十二年,歐陽秉志是第二代傳人,爸爸歐陽偉乾本身已是行內老師傅,阿仔乜都整得出,連阿爸都話:「啲特殊嘢我都唔識整啊。」對住失去摯親的客人,歐陽秉志都盡量滿足要求。「有次客人說,問米時先人說不見了手指,喉嚨骨,話執骨時整唔見咗,之後我便整一些手指,喉嚨骨,耳骨。」呢個「骨科醫生」唔易做,事前要上網了解人骨結構,然後畫圖起草,每條骨都要用竹條紮成,再用硬卡紙和皺紙包實。

他連寵物善終服務都包辦,個多月前有客人愛犬去世,牠因意外也失去了前臂,「牠主人托我幫忙整返隻手,起草畫形狀、用竹條紮一個架,鋪一層紙,再上一層皺紙,再整手指、腳指的形狀,都整咗一、兩日。」特製品的售價,以製作工時與難度而定,作品大多按客人需求而設計。

他的最新訂單,是一支魚王釣竿,唔好睇少這件五百多元的紙紮品,這支釣竿果真有齊麻線魚絲、卡紙轉軸,仲真係轉到添,竿身以幾層雜誌光粉紙包上竹條非常硬淨,希望這位朋友在極樂世界繼續享受釣魚的樂趣。製作每件作品前,歐陽秉志都要上網做足資料搜集。「雖然做完都係一把火燒咗佢,但唔馬虎得,係對先人一種尊重。」

雞翼米線、汽水機,歐陽秉志幾乎嗡得出都整到,不過,佢都唔係萬能,「有人試過要求整迪士尼樂園,成個遊樂場咁款,呢個真係整唔到。」

作為陰間最大供應商之一,歐陽秉志都有過「奇遇」,「有次去寶福殯儀館,見到車頭相內的女子,心想:這麼年輕便死了,怎料回到家後,聽到突然有把聲叫:『老公,老公……』走出廳問老婆,她說沒有叫過,嚇得我,不敢再去殯儀館啊。」咁有冇人報夢讚賞他手工精細?「冇,好彩未試過,不過試試也無妨啊。」

歐陽秉志九七年畢業於大一藝術設計學院,但入行做紙紮只因畢業找不到工作便落鋪幫手,一做便十八年。但歐陽秉志話,紙紮生意其實好難做,有時一、兩個月都未必有訂單。「最風光嘅年代,都係我阿爸嗰時。」七十七歲的歐陽偉乾,在四九年中國解放時期,由中山南下,五十年代學紙紮到六三年創鋪至今。他也見證行業轉變:「以前香港手工平,做出口生意多,而家輪到大陸平,我地好多都係由大陸入貨。」幸好鋪頭月租只萬多元,收支還算平衡。

歐陽偉乾只識做舊式紮作,新潮嘢留給阿仔做,改他名字做「秉志」,其實沒想過他真的繼承衣缽,還顛覆傳統整色整水,不過兩父子沒有因為派別不同而打交:「最重要都係佢有興趣,做得開心。」
熱門新聞
  • 【屋苑商場淫竇成災】馬鞍山師奶大恐慌 商場樓上補習樓下艷女色誘老公(足本版) 435,124 views
  • 【獨家爆做真律師】十優麥明詩考獲美國執業律師牌 一男子陪飛紐約宣誓 (足本版) 103,262 views
  • 【港人愛查另一半】私家偵探爆捉姦奇聞:男友扮踢波其實去叫雞 50,168 views
  • 【馬鞍山商場淫竇風暴】激民憤大專生挑機 艷女白骨爪施襲:我不了解香港法律 43,479 views
  • 【每日壹爆〡是男還是女】愛扮女人喜歡男性 跨性別港男:渴望被保護疼愛 42,145 views
  • 【嫩女友細40年】73歲葉振棠不言休打止痛針開騷 唱完女友即陪入院(足本版) 41,875 views