< 返回
  • 失蹤前專訪》李波:桂民海寫高官情婦 屢收警告
  •   23,916 views │ 2016年01月06日
    留言()

 

一國兩制之下,《基本法》承諾保障港人享有出版及言論自由,這大概是一眾書商仍放膽在港出版中共禁書的原因。去年十月下旬,銅鑼灣書店的母公司巨流傳媒,公司股東桂民海、呂波及旗下兩名職員相繼失蹤後,本來未有特別參與書店運作的李波,每日下午都會到銅鑼灣書店打點,維持書店有限度服務。

李波當時以「桂民海的朋友」、「出版商李先生」的名義接受本刊訪問,披露身在泰國度假的桂民海十月底突然失去聯絡,直至印刷商向他表示桂民海有書趕印卻未收到相關文稿,他致電各人才知大家已告失蹤。及後,巨流董事兼總經理呂波突稱「腰痛」到大陸東北醫病;業務經理張志平表示身在深圳的太太懷孕「出咗狀況」,要陪伴左右;書店店長林榮基則一直未能取得聯絡,自此四人音訊全無。

 

為失蹤同事抱不平

「我本來唔相信,雖然佢(桂民海)出嘅書中國係唔會鍾意,但出書啫,有咩咁大不了,要動用特工去泰國捉人,好大件事㗎嘛,應該唔會啩?」李波當時還信心滿滿認為,只要他不返大陸就不會「被失蹤」,還為在大陸無端白事被限制人身自由的書店職員抱不平:「一本咁嘅書,裡面講乜嘢佢都可能完全唔知,你俾咩書佢佢咪發咩書,你俾本《習近平萬歲》、《中共偉大》俾佢,佢都會照發,佢唔會過問。」

一本書籍面世,必須經過出版、印刷、發行、零售多個步驟。李波深知中共一定先打壓出版商,所以對桂民海失蹤似乎心裡有數,「肯定係出版嗰邊出事先,如果印咗本書,你好唔想見到嘅,你閂咗發行商係冇用,因為可以交俾其他人發行、交俾其他書店賣。」巨流兼顧發行業務,「癱瘓咗你發行嘅運作,變咗有書你都發唔到出去。至於書店我就諗唔通,因為唔係獨家賣書,照計呢個冇乜可能會有事。」

 

領導人情婦書熱賣

李波曾評估,他出版的禁書題材較保守,以為相安無事,「我啲書規矩啲……佢(桂民海)出嘅書多啲有關領導人事,唔好話內幕啲,而係更加八卦啲,公共情婦、軍中妖姬湯燦;母老虎宋祖英,佢最鍾意出呢類同啲女人、情婦有關嘅書。」桂的事業敲門磚正是《中共高官情婦榜》,替他賺取逾百萬元,「第一本書佢就旗開得勝,所以佢比較多偏重呢度,當然亦同佢嘅作者有關。我嘅作者比較嚴謹一啲,冇咁天花龍鳳,當然亦都冇咁賣得。」

李波又踢爆桂民海曾被中共恐嚇,「阿海話有人託人向佢傳話,警告過佢幾次,叫佢小心啲講嘢。佢係寧波人,仲有家姐、父母喺度,就轉告佢叫佢唔好咁激。」他稱,○三年起出版禁書至今,「未試過有人搞我。」

 

黑客早已入侵電郵

但他認為,無孔不入的中共早已將他列入監視名單,「我百分百相信我喺佢哋國安部係有file,都預咗俾佢hack電郵,我直頭知道佢試過。」李波有一位住在深圳的香港作者,「佢幫我寫咗本書,本書都未出,佢個名已經列入禁書嘅黑名單。佢之前未出過書,仲要用筆名,但禁書黑名單寫佢真名。唯一可以攞到個人名,就係hack入我個電郵,因為我同佢電郵來往。」

雖然長期被監視,李波的語氣卻未見緊張,「我又唔係咁擔心,但呢一兩年我都冇返過大陸。出政治書之後,我都有返去,直至姚文田(晨鐘出版社總裁)俾佢判咗坐監,之後我都唔敢返,個個都知走私唔係真正原因。」

 

撰文:時事組     攝影/攝錄:時事組
李波被擄前接受本刊訪問,坦言政治書題材愈敏感愈暢銷,但他近年已「唔敢返大陸」。兩個月後他宣告失蹤,並聲稱以「自己方式返回內地」,事件耐人尋味。
李波失蹤第六日,書店收到署名李波的「平安信」傳真,聲稱情況很好,又指要處理一些問題,不能讓外界知道,因要配合調查,「可能需要一段時間」。(中新社圖片)
銅鑼灣書店老闆及職員五人相繼失蹤,家人報案後,事件備受公眾關注,警方終到銅鑼灣書店搜證調查。
熱門新聞
  • 【黑幫14K操控】一條街十幾個妓女 元朗企街狼招拉客極擾民(足本版) 180,506 views
  • 【呢世最憎周潤發】曾經沉迷嫖賭飲 吳孟達嬲爆周潤發唔借錢(足本版) 160,012 views
  • 【監獄膳食黑幕】監獄廚房係油水位 江湖大佬可分多2隻雞翼(足本版) 125,312 views
  • 【落難西環海味店千金】胡定欣頂起頭家十幾年 仲儲到1100萬磚頭:踏實靠自己(足本版) 105,666 views
  • 【鬧市下體現形】同林峯翻撻無望 千語BB暴瘦變紙板人 (足本版) 90,642 views
  • 【經典斷正〡夜蒲直落】婚姻低潮 馬德鐘撻著胡定欣一齊返歸(足本版) 82,356 views