< 返回
  • 離職,最唔捨得嘅只係一班好同事|聶瞳
  •   10,183 views │ 2018年09月14日
    留言()

 

我試過返一份人工唔高,亦可以大膽講句係冇乜前途嘅工,不過每日返工都真係好開心,從來唔會覺得係捱時間,總之一埋位就知自己要做乜,感覺好自在,成班同事就算稱唔上係兄弟姐妹,但都好熟悉對方,窒嚟窒去又收工。

只係歷史教識我哋,好景總係不常,某一日收到通知,公司玩完喇,大家可以搵定新工,從實際角度去睇,呢件絕對係好事,因為每個同事都有能力去更好嘅公司、做更好嘅工作、攞更好嘅待遇,之前一直留喺度,只係太習慣個工作環境、氣氛,仲有一班同事,留戀嘅純粹係呢份情誼,我知道嚟緊要出大海面對食人魚同埋大白鯊,冇得再同呢班傻仔柴娃娃。

然後最唔想發生嘅事終於出現,就係昔日戰友各散東西,每個人已經融入咗新圈子,各有各忙,最初都可以食下飯飲下嘢,久而久之,愈嚟愈難齊腳,可能個個嘅office hour都唔同,又可能某一兩個長期要OT,上次見面係幾時?原來已經要用年份嚟做單位。

可惜嗎?當然啦可惜啦!不過諗深一層,我哋應該開心先至啱,咁樣證明呢班舊同事好大機會已經有班落,我就曾經有一個經歷,係另一間公司嘅另一位舊同事,離職後用咗一年時間都未搵到正職,周不時打嚟問有冇工作介紹,整整一年都只係靠零碎嘅freelance維持生活,作為一位認識佢嘅人,坦白講真係好難過,雖然唔係自己失業,但個心都會唔舒服。

天下無不散之筵席,嗰啲曾經交過心,一齊共同進退嘅舊同事,我寧願佢哋忙於工作,記住同樣要好好生活就得喇,真正嘅友誼,其實唔使成日見,我哋就算冇講嘢,內心都仲係會記住同埋支持對方,所以各散東西未必唔好,大家只係要開始一段新里程啫,被生活推著走,講到底都係向前行,總好過原地踏步。

-

專欄作者簡介:

辦公室日報 聶瞳

記者出身,後脫離傳媒行業,誤打誤撞加入獵頭公司,幫人搵工,間接令一個家庭得到溫飽,因而成為我的第二人生。

Facebook專頁:

https://www.facebook.com/officedaily/
熱門新聞
  • 【家有魔鬼僱主】有片慎入僱主狂鬧10分鐘 外傭含淚爆魔鬼家規(足本版) 114,304 views
  • 【每日壹爆●艷星風光背後】落難時做過麥當勞大家樂 鄭艷麗: 清潔阿嬸我都做(足本版) 112,516 views
  • 【藝員失婚失業打不死】忘記老公家中荒唐搞女 50歲黎海珊素顏孖男伴出街睇戲 (足本版) 84,683 views
  • 【個仔似足老豆】李琳琳老來得子 70歲姜大衛細仔只得22歲(足本版) 70,067 views
  • 【暗寸姣婆亞姐】被萬綺雯搶走呂頌賢 傳黎海珊入廠掌摑小三(足本版) 69,591 views
  • 【為支飲管爆SEED】西裝惡男大鬧麥記 店員企硬氣走:你慢慢企!(足本版) 63,619 views